प्रिय कामगार बांधवांनो आणि भगिनींनो,
आवाहन
ऑफशोअरला काम करणारा प्रत्येक कर्मचारी हा केवळ ओएनजीसीसाठी काम करणारा कर्मचारी नसतो, तर तो आपल्या कुटुंबाचा आधारस्तंभही असतो.
आपण महिनोन्महिने आपल्या घरापासून, मुलांपासून, आई-वडिलांपासून दूर राहून अत्यंत कठीण आणि जोखमीच्या परिस्थितीत काम करत असतो. समुद्राच्या मध्यभागी, मर्यादित साधनांमध्ये आणि मानसिक तणावात काम करताना आपल्या आरोग्याचा, मानसिक स्थितीचा आणि सुरक्षिततेचा प्रश्न अत्यंत महत्त्वाचा ठरतो.
म्हणूनच ओएनजीसी कडून सुरू करण्यात आलेला “Wellness WeAVE – Offshore Wellness Survey” हा केवळ एक सर्वे नसून आपल्या भविष्याशी, सुरक्षिततेशी आणि कल्याणाशी जोडलेला अत्यंत महत्त्वाचा उपक्रम आहे.
उद्या आपल्या कामाच्या अटी, मानसिक आरोग्य सुविधा, सुट्या, कुटुंबाशी संबंधित धोरणे आणि ऑफशोअरवरील वातावरण सुधारण्यासाठी जे काही निर्णय घेतले जातील, त्याचा पाया ह्या सर्वेवर उभा राहू शकतो.
पेट्रोलियम एम्प्लॉइज युनियनच्या वतीने सर्व ऑफशोअर कर्मचाऱ्यांना कळकळीचे आवाहन करण्यात येते की, कृपया मोठ्या संख्येने आपल्या ईमेल वर आलेल्या लिंक वर जाऊन या सर्वेमध्ये सहभाग नोंदवा आणि आपले मत प्रामाणिकपणे मांडावे.
लक्षात घ्या की, सदरील सर्वे मधील आपली ओळख गुप्त ठेवण्यात येणार आहे म्हणून बिनधास्तपणे आपण आपल्या हरकती नोंदवा, सूचना द्या.
आपण शांत राहिलो तर आपल्या अडचणी कागदावर कधीच दिसणार नाहीत. पण आपण एकत्रितपणे बोललो, तरच व्यवस्थापनाला आपल्या वास्तव परिस्थितीची जाणीव होईल.
लक्षात ठेवा जशी ओएनजीसीला आपल्या कामाची गरज आहे, तशीच आपल्या कुटुंबालाही आपल्या सुरक्षित आणि निरोगी उपस्थितीची गरज आहे. त्यामुळे हा सर्वे केवळ कंपनीसाठी नाही, तर आपल्या स्वतःच्या आणि आपल्या कुटुंबाच्या भविष्यासाठी आहे.
मोठ्या संख्येने सहभाग नोंदवा.
आपला आवाज महत्त्वाचा आहे.
एकजूट हीच आपली ताकद आहे.
पेट्रोलियम एम्प्लॉइज युनियन, मुंबई
“जेव्हा एखादा कामगार कर्मचारी श्रेणीतून अधिकारी पदावर जातो,
तेव्हा तो प्रवास सोपा नसतो.
त्यात वर्षांची मेहनत, कौटुंबिक त्याग आणि युनियनच्या माध्यमातून दिलेला लढा देखील असतो.”
२०११, २०१३ आणि २०१५… ही केवळ वर्षं नाहीत, तर ओएनजीसीच्या अंगणात आपण एकत्र पेरलेल्या स्वप्नांची आणि संघर्षाची सुरुवात होती.
याच वर्षांमध्ये आपल्या कर्मचारी श्रेणीत रुजू झालेले आपले अनेक खंदे शिलेदार या वर्षीच्या PLT (Promotion Linked Transfer) प्रक्रियेमुळे मुंबई रिजनमधून देशाच्या विविध कानाकोपऱ्यांत नव्या जबाबदाऱ्या स्वीकारण्यासाठी रवाना होत आहेत.
एका प्रदीर्घ, अविस्मरणीय प्रवासाची सांगता करत, डोळ्यांत भविष्याची स्वप्ने आणि आठवणींचे गाठोडे घेऊन आपण नव्या कार्यस्थळाकडे पाऊल टाकत आहात.
हा केवळ प्रशासकीय बदल नाही;
हा तुमच्या घामाचा, तुम्ही घेतलेल्या कष्टांचा आणि अविरत केलेल्या समर्पणाचा मिळालेला एक हक्काचा सन्मान आहे !!
कर्मचारी श्रेणीतील तुमच्यासारख्या लढवय्या सहकाऱ्यांच्या ताकदीमुळेच आपली युनियन आज इतकी सक्षम, सजग आणि वज्रमुठीसारखी बलशाली बनली आहे.
व्यवस्थापनाशी दोन हात करताना, हक्काच्या लढाईत आपण खांद्याला खांदा लावून लढलो. अनेक संघर्षांत आपण एकजुटीने आवाज उठवला आणि त्या प्रत्येक कठीण प्रसंगात तुमचे योगदान अनमोल राहिले.
युनियन ही केवळ कागदावर शाहीने उमटवलेली संघटना नसते,
ती कामगारांच्या रक्ताने, घामाने, विश्वासाने आणि संघर्षाने उभी राहिलेली एक जिवंत शक्ती असते आणि तुम्ही या शक्तीचा सर्वात मजबूत आणि अविभाज्य कणा होतात आणि अविरत राहाल !!
आम्हाला तुमचा सार्थ अभिमान आहे !!
आज तुम्ही तुमच्या कर्तृत्वाने पदोन्नती (Promotion) मिळवून अधिकारी पदावर पोहोचला आहात,
ही आपल्या युनियनसाठी अभिमानाची बाब आहे. कालपर्यंत कामगारांचे हक्क सुरक्षित राहावेत म्हणून मैदानात उतरणारे तुम्ही, आज अधिकारी म्हणून नव्या भूमिकेत जात आहात, याचा आम्हाला सार्थ अभिमान आहे.
तुमच्या या दैदिप्यमान प्रवासासाठी तुमचे मनःपूर्वक अभिनंदन!! आणि इतकी वर्षे युनियनसाठी दिलेल्या नि:स्वार्थ योगदानाबद्दल व अतुट साथीबद्दल ‘पेट्रोलियम एम्प्लॉईज युनियन’ कडून आपल्या सर्वांचे मनस्वी आभार!!
नवे अंगण… नवी आव्हाने… नवी संधी व नवा सन्मान…
तुम्ही जिथे जाल, तिथे आपल्या संघर्षाचा आणि कर्तृत्वाचा झेंडा असाच उंच फडकत ठेवाल, ह्याचा आम्हांला पूर्ण विश्वास आहे. तुमच्या पुढील प्रत्येक वाटचालीस, प्रगतीस आणि उज्ज्वल भविष्यासाठी पेट्रोलियम एम्प्लॉईज युनियन परिवाराकडून क्रांतिकारी आणि संघर्षमयी शुभेच्छा!
“श्रम की बूंदों से जिसने, नया इतिहास रचा है, सागर की लहरों पर, जिसका नाम बचा है।
चलो चलें कि अभी पथ बहुत शेष है, ऊर्जा के इस महाकुंभ में, हमारा योगदान विशेष है!”
शुभेच्छुक :
– पेट्रोलियम एम्प्लॉईज युनियन,
मान्यताप्राप्त युनियन,
डब्ल्यू.ओ.यु, ओएनजीसी
सर्व ऑफशोअर रिग व प्लॅटफॉर्म इंस्टॉलेशन्सवर कार्यरत,
प्रिय कामगार बांधवांना जाहीर आवाहन!
सध्या ऑफशोअरवरील पिण्याच्या पाण्याच्या प्रश्नाबाबत अत्यंत गंभीर परिस्थिती निर्माण झाली आहे. अनेक वर्षांपासून ऑफशोअरवर काम करणाऱ्या कर्मचाऱ्यांना पिण्यासाठी बॉटल पाणी उपलब्ध करून दिले जात होते. मात्र आता व्यवस्थापन समुद्रातील पाणी प्रक्रिया करून तेच पिण्यासाठी वापरण्याचा निर्णय राबवण्याच्या दिशेने जात आहे. हा विषय केवळ सुविधा कमी-जास्त करण्याचा नसून थेट कामगारांच्या आरोग्य, सुरक्षितता आणि मानवी हक्कांशी संबंधित आहे.
या निर्णयाविरोधात पेट्रोलियम एम्प्लॉईज युनियनच्या वतीने आंदोलन करण्यात आले होते. त्यानंतर नॅशनल फेडरेशन ऑफ पेट्रोलियम, केमिकल अँड इंजिनियर्स वर्क या संघटनेने महाराष्ट्र शासनाच्या औद्योगिक सुरक्षा व आरोग्य संचालनालयाकडे अधिकृत तक्रार दाखल केली. या तक्रारीची शासनाने गंभीर दखल घेत ONGC व्यवस्थापनाकडून खुलासा मागवला.
ONGC व्यवस्थापनाने शासनाला दिलेल्या उत्तरात काही महत्वाचे मुद्दे नमूद केले आहेत. त्यांनी सांगितले आहे की ऑफशोअरवर पुरवले जाणारे पाणी WHO Guidelines आणि IS-10500 Standards नुसार तपासले जाते, पाण्याचे नियमित परीक्षण केले जाते, आणि ते पिण्यास सुरक्षित आहे. याशिवाय त्यांनी असेही नमूद केले आहे की कामगारांकडून कोणत्याही प्रकारच्या आरोग्यविषयक तक्रारी प्राप्त झालेल्या नाहीत आणि कोणतीही adverse report व्यवस्थापनाकडे आलेली नाही.
परंतु वस्तुस्थिती काय आहे हे ऑफशोअरवर काम करणाऱ्या प्रत्येक कामगाराला माहित आहे. व्यवस्थापन सांगत आहे की पाण्याची टेस्टिंग नियमितपणे केली जाते, परंतु वास्तव असे आहे की जी टेस्टिंग दर दोन दिवसांनी होणे आवश्यक आहे ती अनेक ठिकाणी महिना-महिना होत नाही. ज्या प्रक्रियेचा आधार घेऊन कामगारांच्या आरोग्याची हमी दिली जात आहे, त्याच प्रक्रियेत मोठ्या प्रमाणावर निष्काळजीपणा आणि अनियमितता असल्याचा गंभीर प्रश्न उपस्थित होत आहे.
याशिवाय व्यवस्थापन आपल्या खुलाशामध्ये असेही सांगत आहे की पाण्याच्या तपासणीचे सर्व रिपोर्ट उपलब्ध आहेत आणि संबंधित अधिकाऱ्यांकडे खुले आहेत. मात्र प्रत्यक्षात अनेक ठिकाणी हे रिपोर्ट सहज उपलब्ध करून दिले जात नाहीत. रिपोर्ट दाखवण्यामध्ये टाळाटाळ, माहिती लपवणे आणि पारदर्शकतेचा अभाव स्पष्टपणे दिसून येत आहे. त्यामुळे या संपूर्ण प्रक्रियेबाबत कामगारांमध्ये संशय आणि अविश्वास निर्माण होणे स्वाभाविक आहे.
महाराष्ट्र शासनाच्या औद्योगिक सुरक्षा व आरोग्य संचालनालयाने पुढील पत्रात स्पष्टपणे नमूद केले आहे की, जर तक्रारदार किंवा कामगार या खुलाशावर समाधानी नसतील, तर त्यांनी पुरावे, आक्षेप किंवा हरकती सादर कराव्यात. म्हणजेच आता प्रत्यक्ष कामगारांचे लेखी निवेदन आणि तक्रारी अत्यंत महत्वाच्या ठरणार आहेत.
म्हणून सर्व ऑफशोअर कामगारांना कळकळीचे आवाहन करण्यात येते की, आपण आपल्या इंस्टॉलेशनवर पिण्याच्या पाण्याबाबत असलेली वस्तुस्थिती लेखी स्वरूपात मांडावी. जर पाण्याच्या गुणवत्तेबाबत शंका असेल, पारदर्शकतेचा अभाव वाटत असेल, नियमित माहिती दिली जात नसेल किंवा आरोग्यावर परिणाम होण्याची भीती वाटत असेल तर त्या बाबी अधिकृतरीत्या नोंदवाव्यात.
आपण आपल्या OIM, Installation Manager, Safety Officer, Medic, HR विभाग, Offshore Administration किंवा संबंधित अधिकाऱ्यांना ई-मेलद्वारे अथवा लेखी स्वरूपात तक्रार देऊ शकता. शक्य तितक्या मोठ्या प्रमाणावर कामगारांनी आपल्या हरकती नोंदवणे अत्यंत आवश्यक आहे. कारण उद्या जर शासनाकडे “कामगारांकडून कोणतीही तक्रार नाही” असा दावा पुन्हा करण्यात आला, तर त्याचा थेट परिणाम या संपूर्ण प्रकरणावर होऊ शकतो.
हे लक्षात घ्या की, हा लढा कोणत्याही एका युनियनचा किंवा संघटनेचा नाही. हा प्रत्येक ऑफशोअर कामगाराच्या आरोग्याचा, सन्मानाचा आणि भविष्यातील सुरक्षिततेचा प्रश्न आहे. ऑफशोअरवर काम करणारा कर्मचारी हा देशाच्या ऊर्जा सुरक्षेसाठी अत्यंत कठीण परिस्थितीत काम करतो. त्यामुळे सुरक्षित आणि दर्जेदार पिण्याचे पाणी ही कोणतीही अतिरिक्त सुविधा नसून कामगारांचा मूलभूत अधिकार आहे.
आज जर आपण शांत राहिलो, तर उद्या व्यवस्थापन “कोणतीही हरकत नाही” या नावाखाली इतर मूलभूत सुविधांवरही गदा आणू शकते. म्हणूनच प्रत्येक कामगाराने पुढे येणे, आपली भूमिका स्पष्टपणे मांडणे आणि अधिकृत तक्रार नोंदवणे ही काळाची गरज आहे.
एकजूट, जागरूकता आणि लेखी पुरावे यांच्याच जोरावर हा लढा मजबूत होणार आहे.
पेट्रोलियम एम्प्लॉईज युनियन
मान्यताप्राप्त युनियन,
डब्ल्यू.ओ.यु, ओएनजीसी, मुंबई.
